АСТАНА. ҚазАқпарат - Семейдің «Елімай» клубы футболдан 2023 жылғы Қазақстан кубогының келесі кезеңіне жолдама алды, деп хабарлайды ҚазАқпарат тілшісі.
Семейлік клуб ұзақ жылғы үзілістен кейін қайта құрылып, биыл бірінші лигада ойнауға мүмкіндік алды. Команда алдымен Қазақстан кубогында доп тепті. Олар В тобында Астананың «Жеңіс», Түркістан облысының «Arys» және «Тараз» командаларын артқа тастап кетті.
Ал А тобынан Оралдың «Ақжайығы» екінші кезеңге жолдама алды. Оралдық клуб Алматының «Jas Qyran», Өскеменнің «Altai» және алматылық AKAS клубтарынан озды.
Жарыстың екінші сатысында енді «Елімай» D, «Ақжайық» С тобының жеңімпаздарымен негізгі кезеңге берілетін жолдаманы сарапқа салады. Жеңімпаз атанған екі команда жарыстың негізгі кезеңінде Премьер-лигада ойнайтын 14 команда қатарына қосылады.
Еске салайық, бұған дейін футболдан 2023 жылғы Қазақстан кубогының жеребесі тартылғанын жазған болатынбыз.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.