АСТАНА. KAZINFORM – Қазақстандық балуан Ризабек Айтмұхан Испанияның Понтеведра қаласында күрес түрлерінен 20 жасқа дейінгілер арасында өтіп жатқан әлем чемпионатының финалына жолдама алды.
Қазақстандық еркін күрес шебері 97 келіге дейінгі салмақта алдымен ирандық Аболфазла Давуд Бабаланы 12:1 есебімен мерзімінен бұрын тізе бүктірді. Содан кейін ширек финалда грекиялық Николаос Караваносты дәл сондай есеппен қапы қалдырды.
Ризабек жартылай финалда америкалық Джастин Рэйдмахерді де айқын басымдылықпен ұтты – 9:1. Финалдық белдесу 7 қыркүйек күні болады.
Ризабек Айтмұхан өткен жылы 19 жасында ересектер арасында 92 келіге дейінгі салмақта айды аспанға шығарып, тәуелсіз Қазақстан тарихында еркін күрестен алғаш рет әлем чемпионы атанған болатын.
Еске сала кетейік, бұдан бұрын қазақстандық балуанның жастар арасында әлем чемпионы атанғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).