Қазақстандық танымал актер Шәріп Серік түсіру алаңынан қуылды

АЛМАТЫ. KAZINFORM – Танымал қазақстандық актер Шәріп Серік желідегі видеодан кейін кино алаңынан шеттетілді. Полиция тергеу жүргізіп жатыр.

Алматы тұрғыны Әлия Бөтеева әлеуметтік желіде актер Шәріп Серіктің қол көтергенін айтып, дәлел ретінде видео мен суреттер жариялады. 

Алматы қалалық Полиция департаменті аталған дерек бойынша тергеу басталғанын мәлімдеді.

– Тергеу амалдары жүргізіліп жатыр. Оқиғаның болған орны мен уақытын қоса алғанда, объективті мән-жайлар анықталып, Қазақстан Республикасының заңнамасына сәйкес шаралар қабылданатын болады, – деп хабарлады ведомстводан.

Sәlem Entertainment компаниясы актер Шәріп Серікпен әріптестік қарым-қатынасын тоқтату туралы шешім қабылдағандарын мәлімдеді. 

– Соңғы оқиғаларға байланысты Sәlem Entertainment ұжымы Шәріп Серікті «қара тізімге» енгізіп, онымен кез келген ынтымақтастықты толығымен тоқтатты. Бұған дейін жарияланған «Шакал» сериалы мен «Qarga» сериалының үшінші маусымы ресми түрде жабылды. Сонымен қатар, актер «Meow» сериалының екінші маусымында басты рөлдердің бірін сомдауы тиіс болған, алайда ол жобадан толықтай алынып тасталды. Сондай-ақ «Патруль: последний приказ» фильмінің шығармашылық ұжымы актердің қатысуымен түсірілген көріністерді кинонұсқадан алып тастау жұмыстарын қолға алды. Актермен барлық келісім-шарт тоқтатылды, – делінген хабарламада.

Айта кетсек, былтыр көліктегі полиция департаменті Қайрат Нұртастың үстінен «Алматы-Астана» әуе рейсінде ұсақ бұзақылық және денсаулыққа қасақана жеңіл зиян келтіру фактісі бойынша әкімшілік іс қозғалғанын хабарлаған едік. 

Кейін соттың қаулысымен Қайрат Нұртас 15 тәулікке қамауға алынды.