Ерлер арасында Дамир Жалғасбай мен Даниял Рахматуллаев үш кездесуін жеңіспен тәмамдады.
Қазақстандық жұп алғашқы айналымда-ақ жарыстың 2-ракеткалары болып тіркелген ресейліктер Иван Грецкий – Егор Плешивцевті сенсация жасап, екі партияда жеңді – 6:4, 6:4.
Дамир мен Даниял ширек финалда отандастары Ілияс Маратұлы – Арсений Требухиннен айласын асырды – 6:1, 2:6, 10:8.
Д.Жалғасбай – Д.Рахматуллаев бүгін жартылай финалда ресейліктер Дмитрий Бессонов – Григорий Шебекинді қапы қалдырды – 7:6 (8:6), 6:3.
Қазақстандық дуэт финалда Беларусь өкілі Мартин Борисюк – үндістандық Каран Сингхпен бас жүлдені сарапқа салады.
Әйелдер арасында доданың 2-ракеткалары болып тіркелген Асылжан Арыстанбекова – Іңкәр Дүйсебай үмітті ақтады.
Асылжан мен Іңкәр бастапқыда түркиялық Селина Атай – ресейлік Анастасия Мозгалеваны тықсыра білді – 7:6 (7:1), 6:1.
А.Арыстанбекова – І.Дүйсебай ширек финалда оңтүстіккореялық Ха Ым Ли – ресейлік Анна Пушкареваны тізе бүктірді – 6:2, 6:3.
Асылжан – Іңкәр жартылай финалда ресейліктер Виктория Милованова – Дарья Зелинскаямен тартысты өткен матчта камбэк жасады – 4:6, 6:3, 10:7.
Қазақстандық жұп соңғы бәсекеде турнирдің 1-ракеткалары, оңтүстіккореялықтар Хирае Им – Еунсшае Киммен кортқа шығады.
Д.Жалғасбай мен А.Арыстанбекова бүгін сондай-ақ жекелей сында да қарсыластарын ұтып, ширек финалға шыққан болатын.
Еске сала кетейік, бұдан бұрын Астана турнирінде қос қазақстандық теннисшінің ширек финалға жолдама алғанын жазған едік.