АСТАНА. KAZINFORM — Қазақстандық теннисшілер Асылжан Арыстанбекова мен Іңкәр Дүйсебай жұптық сында Астана ITF W15 турнирінің финалына жолдама алды.
Жарыстың 1-ракеткасы болып тіркелген қазақстандық жұп барлығы үш кездесуін сәтті өткізді.
Асылжан мен Іңкәр жартылай финалда ресейліктер Валерия Луценко – Дарья Харланованың мысын басты – 7:6 (7:4), 6:0.
Асылжан Арыстанбекова – Іңкәр Дүйсебай финалда ресейлік Мария Шолохова – оңтүстіккореялық Гаыль Чжанмен бас жүлдені сарапқа салады.
Тағы бір қазақстандық, әлемнің 664-інші, осы жарыстың 6-ракеткасы Аружан Сағындықова жекелей сында жартылай финалға өтті. Ол ширек финалда рейтингіде 1 399-орындағы отандасы Іңкәр Дүйсебайды қапы қалдырды – 6:3, 6:3.
Аружан финалға шығу үшін рейтингіде 1 006-сатыдағы таиландтық Камонван Йодпетчпен таласады.
Еске сала кетейік, бұдан бұрын Юлия Путинцеваның Швециядағы жарыстың жартылай финалына жолдама алғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).