ОРАЛ. ҚазАқпарат - Қазақстандық ескекші Мария Бровкова Италияның Ауронзо қаласында байдарка мен каноэдан жасөспірімдер мен жастар арасында өтіп жатқан әлем чемпионатында күміс жүлдегер атанды, деп хабарлайды ҚазАқпарат тілшісі.
Батысқазақстандық спортшының анасы әрі жеке бапкері Елена Бровкованың мәлім еткеніндей, Мария 18 жасқа дейінгілер арасында бүгін бір адамдық каноэда 500 метр қашықтықта мәре сызығын екінші болып қиды.
Қазақстандық ескекші тек мажарстандық Агнес Кисқа жол берді.
«Қызым бүгін бір адамдық каноэда 200 метр қашықтықта өнер көрсетеді. Ертең 5000 метрлік жарыста сынға түседі», - деді ҚазАқпарат тілшісіне Е. Бровкова.
Мария Бровкова өткен жылы жасөспірімдер арасында әлем чемпионатында да алтын мен күміс жүлдені жеңіп алған еді. Оған кеше тағы бір алтынды қосты.
Еске сала кетейік, бұдан бұрын қазақстандық ескекші Мария Бровкованың тағы да әлем чемпионы атанғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).