НҰР-СҰЛТАН. ҚазАқпарат – Қазақстандық Денис Евсеев жұптық сында Шымкентте өтіп жатқан Beeline Challenger 80 турнирінің жартылай финалына шықты, деп хабарлайды ҚазАқпарат тілшісі.
Д.Евсеев ресейлік Александр Шевченкомен бірге ширек финалда жарыстың 2-ракеткалары, үндістандық Арджун Кадхе – украиналық Владислав Манафовпен күш сынасты.
Бірінші партияда қазақстандық-ресейлік жұп басымдылық танытты – 6:4.
Екіншісінде А.Кадхе мен В.Манафов есе қайырды – 6:3. Дегенмен супер тай-брейкте Д.Евсеев пен А.Шевченко сәтті ойнады – 11:9.
Бір сағат 23 минутқа созылған матчта қарсыластар 7 брейк-пойнттың екеуін пайдалана білді.
Д.Евсеев пен А.Шевченко финалға шығу үшін швейцариялық Антуан Белье – бразилиялық Габриэль Декамппен таласады.
Тағы бір қазақстандық Григорий Ломакин ресейлік Ян Бондаревскиймен бірге ширек финалда норвегиялық Виктор Дурасович – ресейлік Иван Гаховқа есе жіберді – 4:6, 3:6.
Еске сала кетейік, бұдан бұрын екі қазақстандық теннисшінің Шымкент турнирінің ширек финалына шыққанын, Юлия Путинцеваның Римде әлемнің бұрынғы бірінші ракеткасын ұтқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).