НҰР-СҰЛТАН. ҚазАқпарат – Қазақстандық Бейбіт Жукаев елордада өтіп жатқан ITF World Tennis Tour - M25 турнирінің ширек финалына шықты, деп хабарлайды ҚазАқпарат тілшісі.
Қазақстан теннис федерациясы мәлім еткендей, жарысты ұйымдастырушылардан арнайы шақырту алған Б.Жукаев екінші айналымда осы доданың 4-ракеткасы, аустралиялық Джейсон Кублермен кездесті.
Ақтау теннис мектебінің түлегі, 20 жастағы Бейбіт Жукаев 1:6, 7:6 (11:9), 7:5 есебімен жеңіске жетті.
Үш сағат 32 минутқа созылған аса тартысты матчта Бейбіт 11 эйс, 2 брейк жасады. Қарсыласы, 28 жастағы Д.Кублер 6 эйс, 4 брейкке қол жеткізді.
«Тәжірибелі теннисшіні жеңгеніме қуаныштымын. Бүгін ауа райы қолайлы болмай, күшті жел кедергі жасады. Екінші партияда соған бейімделіп, допты жақсы бере алдым. Джейсон да керемет ойнады. Дегенмен өз жоспарымды аяғына дейін жүзеге асыра білдім», деді Б.Жукаев.
Қазақстандық теннисші жартылай финалға шығу үшін ресейлік Петр Бирюковпен таласады.
Еске сала кетейік, бұдан бұрын Зара Дәркеннің Париждегі турнирді жеңіспен бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).