Қазақстанның үздік теннис бапкерлері марапатталды
Қазақстан теннис федерациясынан мәлім еткеніндей, жеңімпаздар ғана емес, арнайы аталымдарға ие болғандар да аталып өтілді.
10 және одан кішілер санаты бойынша үздік бапкер – Андрей Ван (Smash теннис орталығы, Өскемен).
12 және одан кішілер санаты бойынша – Амал Сұлтанбеков (Gorky Tennis Park, Алматы).
14 және одан кішілер санаты бойынша – Мұхамадамин Ерматов (Beeline Arena, Астана).
18 және одан кішілер санаты бойынша – «Қазақмыс» теннис клубы (Алматы).
Вячеслав Соколовский («Эйс» теннис орталығы, Алматы) мен Өткір Абдуллаев («Эйс», Ақтөбе) 2022 жылдың үздік аға бапкері атанды.
Сондай-ақ Team Kazakhstan академиясының бапкері Сергей Квак алғысхатпен және ескерткіш сыйлықпен марапатталды. Оның басшылығымен 14 жасқа дейінгі жасөспірімдер құрамасы алғаш рет әлем чемпионатының үздік төрттігіне кірді.
Арбадағы паралимпиалық теннистен Жасұлан Алниязов жыл бапкері болса, осы спорт түрінің дамуына үлес қосқан Ержан Исақов пен Набижон Якобович ұмыт қалмады.
Биылдан бастап Қазақстан теннис федерациясы елімізде арбадағы және адаптивтік теннисті кеңінен таратып, дамытуды қолға алды. Алматы қаласында қыркүйек айында паралимпиалық теннистен алғаш рет ел чемпионаты өтті. Демеушілер есебінен осы біріншіліктің жеңімпаз-жүлдегерлері алдағы жыл бойы 200 мың, 150 мың және 100 мың теңге көлемінде стипендия алатын болды.
Еске сала кетейік, бұдан бұрын үстел теннисінен Алан Құрманғалиевтің әлем чемпионатында алтынға қоса қола медаль жеңіп алғанын жазған болатынбыз.
Сондай-ақ Елена Рыбакина әлемдік рейтингіде ТОП-20 теннисшіге жуықтады.
Фото: ktf.kz