Келесі жылы Алматыда 300 шақырым жол жөнделеді
АЛМАТЫ. KAZINFORM – Келесі жылы Алматыда 35 шақырым жаңа жол салынады. Бұл туралы орталық коммуникациялар қызметінің көшпелі баспасөз мәслихатында қала әкімі Ерболат Досаев айтты.
– Алматы қаласын дамыту бағдарламасының басым бағыты шеңберінде қаланың тұрақты көлік ифрақұрылымы қалыптасып жатыр. Биыл 25 км жаңа жол салынды, Құлжа тас жолы 6 жолаққа дейін кеңейтілді, 255 көшеде 250 км жолға орташа жөндеу жүргізілді. Сондай–ақ, 2024 жылы Саин – Мөңке би көшелеріндегі жол айырығы бойынша көлік қозғалысы ашылды, – деді қала әкімі.
Оның айтуынша, келесі жылы 35 шақырым жаңа жол салынып, 300 шақырым жолға орташа жөндеу жұмыстары жүргізіледі.
– Сондай–ақ, көлік байланысын Сейфуллин-Жансүгіров жол айырығын, екі радиалды (Саин, Рысқұлов) және екі магистральды көшені (Қажымұқан, Төле би) ұзарту қамтамасыз етіледі. Бұл жұмыстар сапалы жолдардың үлесін 2024 жылғы 92% - дан 2025 жылы 95% - ға дейін ұлғайтуға мүмкіндік береді,– деді Ерболат Досаев.
Осыған дейін Алматыда 2025 жылы Абай және Саин көшелерін ұзарту жұмыстары толық аяқталатыны туралы жазған едік.
Еске салайық, бұған дейін Алматыда жаңа үлгідегі көлік тұрақтары пайда болатынын жазғанбыз.