НҰР-СҰЛТАН. ҚазАқпарат - Қазақстандық «Барыс» құрлықтық хоккей лигасының плей-офф сатысында бүгін, 9 наурызда Ресейде «Металлург» (Магнитогорск) командасымен бесінші кездесуін өткізеді, деп хабарлайды ҚазАқпарат тілшісі.
Бүгінгі кездесуде ресейлік команда алғашқы болып есеп ашты. Ойынның 16-минутында Семён Кошелев мергендік танытты. Ал 40-минутта қазақстандық командадан Кирилл Савицкий таразы басын теңестірген еді.
Одан кейін ресейлік Анатолий Никонцев 47-минутта гол соқса, 51-минутта Денис Зернов есепті ұлғайта түсті.
Осылайша «Барыс» қарсыласына 1:3 есебімен жол берді.
Жеңістер сериясында 4:1 есебімен жеңіске жеткен «Металлург» 1/4 финалға жолдама алды.
Екі команда бұған дейін плей-офф сатысында төрт мәрте жолықты. Оның екеуінде «Барыс» жарысты жалғастырса, екеуінде «Металлург» клубының жолы болды.
Қазірге дейін жарыстың аталған сатысына Ресейдің СКА, «Спартак», ЦСКА командалары шығып үлгерді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.