АСТАНА. ҚазАқпарат – «ПСЖ» шабуылшысы Килиан Мбаппе Франция чемпионатында өз командасының 3 мыңыншы голын соқты, деп хабарлайды ҚазАқпарат тілшісі.
Сhampionat.com сайтынан алынған мәліметке қарағанда, «ПСЖ» Франция біріншілігінде осындай көрсеткішке қол жеткізген 12-клуб атанды. Бұл үшін париждіктерге 1 858 матч қажет болды. Тек, «Марсель» (1 801) мен «Сент-Этьен» (1 816) ғана аз ойындарымен осындай межеге жетті.
Франция құрамасының шабуылшысы Килиан Мбаппе ел чемпионатының 27-турында, сырт алаңда «Брестпен» (2:1) өткен матчтың 90-минутында жеңіс голын енгізді. Бұл – команданың чемпионаттағы 3 мыңыншы голы еді.
Биылғы біріншілікте Мбаппе 23 кездесуге қатысып, 19 голмен бірге 3 нәтижелі пастың авторы атанды.
Осы ойыннан кейін 66 ұпай жинаған «ПСЖ» екінші орында келе жатқан «Марсельден» 11 ұпайға ұзап кетті.
Келесі турда, 19 наурызда «ПСЖ» «Ренн» командасын қабылдайды.
Еске сала кетейік, бұдан бұрын Мохамед Салахтың «Ливерпуль» тарихындағы ең үздік сұрмерген атанғанын жазған болатынбыз.
Фото: Сhampionat.com
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).