Қызылордадағы АИТВ-инфекциясын жұқтыру оқиғасынан кейін бұйрыққа өзгеріс енгізіледі

АСТАНА. KAZINFORM – Денсаулық сақтау министрі Ақмарал Әлназарова Қызылорда қаласында перзентханада қан құйылған әйелден кезекті тексеру кезінде АИТВ-инфекциясы анықталған жағдайға қатысты түсінік берді.

- Оқиға перинаталдық орталықта болды және ол бойынша барлық республикалық орталықтар тарапынан тиісті тексерулер жүргізілді. Анықталғандай, инфекция жұқтыру көзі болған пациент қан тапсырған кезде «сұр-теріс терезе» кезеңінде болған, яғни ол вирус жұқтырған, бірақ қан талдауы оны көрсетпеген, - деді Ақмарал Әлназарова Мәжіліс қабырғасында өткен баспасөз мәслихатында.

Сондай-ақ министр аталған жағдайда медициналық көмекті көрсету стандарттары тікелей бұзылмағанын айтып отыр.

- Бұл жағдайдан тиісті қорытынды шығардық, бұйрықтарға өзгерістер енгізіп жатырмыз. Бірақ, медициналық көмек көрсету барысында қандай да бір стандарттың қасақана бұзылу жағдайы болған жоқ, — деді ол.

Бұл жағдайға кім жауапты болады деген сауалға ведомство басшысы әлемдік тәжірибеде инкубациялық кезеңде АИТВ-инфекциясы клиникалық, аспаптық немесе зертханалық әдістермен анықталмайтын жағдайдың барын айтты.

- Пациент «сұр-теріс терезе» кезеңде қан тапсырған. Соның салдарынан тиісті процедуралар барысында жұқтыру жағдайы болды. Қазір пациент толықтай бюджет есебінен тиісті ем қабылдап жатыр, бақылауда, ал баласының барлық талдау нәтижелері теріс шықты, ол да бақылауда. Өкінішке қарай, мұндай казуистикалық жағдай әлемде кездеседі, - деп түйіндеді Ақмарал Әлназарова.

Еске сала кетейік, биыл ақпанда Қызылорда қаласында перзентханада қан құйылған әйелден кезекті тексеру кезінде АИТВ-инфекциясы анықталған.