АСТАНА. KAZINFORM – Бүгін футболдан UEFA Конференция лигасының екінші іріктеу кезеңінде қазақстандық «Тобыл» жарысты аяқтауға мәжбүр болды.
Жарыстың аталған сатысында қостанайлық клуб қиын қарсыласқа тап болды. Швейцариялық «Санкт-Галлен» клубымен жұп құраған олар алғашқы кездесуде 1:4 есебімен жеңіліп қалған еді. Сондықтан қарымта кездесуде қостанайлық клуб кем дегенде үш доп айырмасымен жеңуі қажет болатын.
Қостанайда өткен ойында алаң иелері дегеніне жете алған жоқ. Тәжірибелі қарсыласының қақпасынан саңылау таба алмады. Есесіне өз қақпасына 73-минутта бір гол жіберіп алды.
Сондай-ақ тәртіп бұзуына байланысты қостанайлық клубтан Эссьен Эдедем мен Бейбіт Ғалым қызыл қағаз алып, алаңнан қуылып кетті.
Айта кетсек, бұдан бұрын «Ордабасы» пенальтилер сериясы арқылы «Дифферданж-03» командасынан басым түсті.
Ал Марин Томасовтың жалғыз голы «Астананы» Конференция лигасы үшінші кезеңіне алып шықты.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.