Әйел нәрестенің өліміне дәрігерлердің салғырттығы себеп болғанын жазды: бала ауруханаға демікпемен түскен. Анасының айтуынша, оған нақты диагноз қою мүмкін болмады. Бөлімшеде бірнеше күн жатқан бала жансақтау бөлімінде көз жұмған. Бұл фактіге Қостанай облысының денсаулық сақтау басқармасы түсінік берді.
— Денсаулық сақтау басқармасы Қостанай облыстық балалар ауруханасында көз жұмған баланың туыстары мен жақындарына қайғыларына ортақтасып көңіл айтады. Осы іске байланысты денсаулық сақтау басқармасында қызметтік тексеру басталды. Сондай-ақ оқиғаға қатысты сот-медициналық сараптама жүргізілетінін хабарлаймыз. Сараптама нәтижелері мен медициналық фармацевтикалық қызметтің сапасы, бақылау комитетінің (ҚҚМДБ) қорытындысы ұсынылады, - деп хабарлады ведомство.
Қостанай облысының полиция департаменті түсінікті кейін беруге уәде етті.
Бұған дейін Алматы облысында жан түршігерлік оқиға болған еді. Онда қараусыз қалған ғимараттан жаңа туған нәрестенің денесі табылды.