АСТАНА. KAZINFORM - Футболдан Қазақстан Премьер-лигасының екінші турында елордалық «Астана» «Жетісудан» басым түсіп, қатарынан екінші мәрте жеңіске жетті
Кездесу барысында елордалық команда тізгінді өз қолына алуға тырысты. Бірінші кезеңде командалар бір-бірінің қақпасына гол соға алған жоқ. Екінші кезеңде есепті өзгертетін бірнеше мүмкіндік болған еді. Десе де кездесу тағдырын шешкен екі гол ойын соңына таман соғылды.
Ойынның 87-минутта «Астана» сапынан Ян Вороговский есеп ашса, 92-минутта Эльхан Астанов пенальтиден мүлт кеткен жоқ. Осылайша елордалық клуб қарсыласынан 2:0 есебімен басым түсті.
Енді «Астана» 31 тамызда «Елімаймен» кездессе, 30 наурызда «Атыраумен» ойнайды. Екінші турда 6 наурыз күні «Қайсар» (Қызылорда) мен «Қызылжар» (Петропавл), «Атырау» мен «Ордабасы» (Шымкент), «Тобыл» (Қостанай) мен «Елімай» (Семей) жасыл алаңға шығады.
Ал, 7 наурыз күні «Жеңіс» (Астана) пен «Шахтер» (Қарағанды), «Тұран» (Түркістан) мен «Қайрат» (Алматы) шеберлік байқасады.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.