НҰР-СҰЛТАН. ҚазАқпарат - «Барыс» бүгін Құрлықтық хоккей лигасындағы кезекті ойынын сырт айдында Ресейдің «Металлург» (Магнитогорск) командасымен өткізді, деп хабарлайды ҚазАқпарат тілшісі.
Ойын барысында қазақстандық команда алғашқы минуттарда басымдық көрсетті.
Нәтижесінде 5-минутта Кёртис Валк есеп ашса, Мэтт Фрэттин 23-минутта есепті үстемелей түсті.
Бұдан кейін ресейлік командадан Никита Коростелёв 24-минутта есеп айырмасын қысқартса, 27-минутта «Барыс» хоккейшісі Коди Куник тағы да басымдықты арттырды.
Келесі кезекте «Металлург» сапынан Андрей Чибисов 39, Артём Земчёнок 42-минуттарда қос шайба соғып, таразы басын теңестірді.
Ал 51-минутта Брендан Лайпсик «Металлург» командасын алға шығарды.
Кездесуде «Барыс» қарсыласына 3:4 есебімен есе жіберді.
Еске салсақ, бұдан бұрын екі команда бүгінге дейін 53 мәрте шеберлік байқасты. Оның 18-і «Барыстың» басымдығымен аяқталса, қалғанында ресейлік клубтың мерейі үстем болды.
Енді «Барыс» 1 қазанда Ресейде «Динамо» (Мәскеу) командасымен кездеседі.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.