Қызылорда облысында көлік қозғалысына шектеу қойылды

ҚЫЗЫЛОРДА. ҚазАқпарат - Қызылорда облысында ауа райының нашарлауына байланысты көлік қозғалысына шектеу қойылды, деп хабарлайды ҚазАқпарат тілшісі.

Қызылорда облысында ауа райының нашарлауы байқалып тұр.

«Осыған байланысты «Қазавтожол» АҚ Қызылорда облысы бойынша филиалынан республикалық маңызы бар автомобиль көлік қозғалысына шектеу қою туралы шешім қабылданды. Ауа-райының нашарлауына байланысты 3 ақпанда Астана уақытымен 12.40-тан бастап республикалық маңызы бар «Самара-Шымкент» автомобиль жолының 1357-1715 шақырым аралығында барлық көлік қозғалысына шектеу қойылды. Ол Арал қаласынан Жалағаш ауданының аумағына дейінгі аралықты қамтиды», - деді облыстық төтенше жағдайлар департаментінен.

Еске салсақ, Қызылорда облысында бүгін 140 мыңнан астам оқушы қашықтан оқиды.