АСТАНА. KAZINFORM — Ирактағы американдық HKN Energy компаниясы басқаратын Сарсанг кен орнында мұнай өндіру дрон шабуылынан кейін тоқтатылды. Бұл туралы автономиялық аймақтағы мұнай министрлігінің қауіпсіздік жөніндегі кеңесшісі Карван Бабан мәлімдеді, деп жазды ТАСС.
— Екі ұшқышсыз ұшақ мұнай кен орнына шабуыл жасады, — деді кеңесші.
Шабуыл өндіріс орынына зақым келтіріп, компания мұнай өндіруді тоқтатты. Қауіпсіздік кеңесшісі «шабуылдан зардап шеккендер жоқ» деп қосты.
Еске салайық, ақпанның 28-і күні Ирактағы әскери база шабуылға ұшырады. Кейін елдегі АҚШ-тың Виктория әуе базасына дрондар шабуыл жасады.
Сондай-ақ Ирактың барлық провинцияларында ұлттық энергия жүйесінің істен шығуына байланысты жарық жаппай сөндірілді.
Динара Маханова
Қорқыт ата атындағы Қызылорда мемлекеттік университетінің түлегі. Еңбек жолын 2011 жылдан бастаған. Әр жылдары аймақтық басылымдар мен «Kyzylorda-news.kz» ақпарат агенттігі және республикалық «Астана» телеарнасында жұмыс істеген.