Атап айтқанда, қорда 452 тонна 200 келі қант, 70 тонна күріш, 40 мың литр екі түрлі сұйық май, 64 тонна тұз, 25 тоннадай қарақұмық, 45 тонна макарон бар.
Қордағы азық-түліктің жалпы құны — 244 миллион 300 мың теңге. Қазіргі таңда тұрақтандыру қорындағы тауарларды сауда орындарына сату бағасы бекітілген. Мәселен, қанттың келісі — 350 теңге, күріш — 350 теңге, сұйық май («шедевр») — 660 теңге, сұйық май («олейна») — 560 теңге, Арал тұзы — 65 теңге, қарақұмық — 180 теңге, макарон — 260 теңге.
Мамандардың айтуынша, бұл тауарлар әлеуметтік маңызы бар азық-түлік тауарларына баға өсімі болған жағдайда, сауда орындарына жоғарыда көрсетілген бағада өткізіледі. Ары қарай сауда орындары да бекітілген бағада сатады. Мысалы, қанттың бекітілген сату бағасы — 380 теңге, күріш — 385 теңге, сұйық май («шедевр») — 720 теңге, Арал тұзы — 70 теңге, қарақұмық — 198 теңге, макарон — 285 теңге.
— Тұрақтандыру корында ұзақ мерзімді сақтауға болатын тауарларды сақтаймыз. Қалған көкеністерді, жұмыртқа, тауық еті сияқты азық-түлікті айналым механизмі бойынша кәсіпкерлерге қажет кезде ғана сатып аламыз. Қордағы тауарлар шамамен жыл соңына дейін жетеді. Азайып жатса, қосымша алдырамыз, — дейді облыстық кәсіпкерлік және сауда басқармасынан.
Бұған дейін Ақтауда тұтынушылардың құқықтарын бұзғаны үшін ірі сауда желісіне айыппұл салынғаны туралы жазған болатынбыз.