АҚТАУ. KAZINFORM — Қайғылы оқиға 10 мамыр күні мектеп ұжымының табиғат аясындағы демалысы кезінде болған. Ер адам кәуапқа қақалып, әріптестерінің көз алдында көз жұмған. Полиция бұл дерек бойынша жан-жақты тексеру жүргізіліп жатқанын хабарлады.
Ақтау қаласындағы мектептердің бірінің қызметкерлері Маңғыстау ауданындағы Жармыш ауылы маңында орналасқан Аралбай сарқырамасына демалуға барған. Табиғат аясындағы дастархан барысында 56 жастағы ер адам кәуап сүйегіне қақалып, оқиға орнында қайтыс болған.
Маңғыстау облыстық Полиция департаментінің баспасөз қызметі аталған дерек бойынша тексеру жұмыстары басталғанын мәлімдеді.
- Тергеушілер жазатайым оқиғаның барлық мән-жайы мен себебін анықтап жатыр. Құқық қорғау органдары азаматтарды табиғат аясындағы демалыс кезінде барынша сақ болуға шақырады, - делінген хабарламада.
Бұған дейін, Маңғыстауда табиғи нысанды бүлдірген тұрғын 25 тәулікке қамалған болатын.
Аягөз Ізбасарова
Ізбасарова Аягөз Оралбайқызы телевизия саласында 2003 жылдан бері жұмыс істейді. Еңбек жолын «Қазақстан» РТРК» АҚ Маңғыстау облыстық филиалы «Қазақстан-Ақтау» телеарнасында жүргізуші-редакторлықтан бастап, редактор, шеф-редактор қызметтерін атқарды. Соңғы 7 жылдан бері «Қазақстан» Ұлттық арнасының Маңғыстаудағы меншікті тілшісі. Ақпарат саласының үздігі. Kazinform халықаралық ақпарат агенттігінде 2024 жылғы мамырдан бастап қызмет етеді.