АҚТАУ. KAZINFORM – Маңғыстаулық полицейлер бекіре мен уылдырықтың заңсыз айналымын анықтады. Олар прокуратураның үйлестіруімен өткен жедел-іздестіру шарасы барысында жергілікті тұрғындарды ұстаған.
Тінту жұмыстарын жүргізу кезінде күдіктілердің бірінен салмағы 88 келі жиырма дана бекіре тұқымдас балығы тәркіленді. Ал екінші тұрғыннан қара түсті балық уылдырығына ұқсас зат табылған. Тәркіленген заттың салмағы 860 граммды құрайды.
Өсiмдiктердің немесе жануарлардың сирек кездесетiн және құрып кету қаупi төнген, сондай-ақ пайдалануға тыйым салынған түрлерімен, олардың бөліктерімен немесе дериваттарымен заңсыз айналысу дерегі бойынша сотқа дейінгі тергеп-тексеру басталған.
Бұған дейін, Атырау облысында браконьерлерден бір айда 300 келіден аса бекіре тәркіленгені туралы жазған болатынбыз.
Аягөз Ізбасарова
Ізбасарова Аягөз Оралбайқызы телевизия саласында 2003 жылдан бері жұмыс істейді. Еңбек жолын «Қазақстан» РТРК» АҚ Маңғыстау облыстық филиалы «Қазақстан-Ақтау» телеарнасында жүргізуші-редакторлықтан бастап, редактор, шеф-редактор қызметтерін атқарды. Соңғы 7 жылдан бері «Қазақстан» Ұлттық арнасының Маңғыстаудағы меншікті тілшісі. Ақпарат саласының үздігі. Kazinform халықаралық ақпарат агенттігінде 2024 жылғы мамырдан бастап қызмет етеді.