Нигерияда лаңкестер 10 тұрғынды мерт қылды

АСТАНА. KAZINFORM — Нигерияның орталығындағы Плато штатында болған қарулы шабуылдан 10 адам қаза тапты, деп хабарлайды Анадолы.

Бером жастар қауымдастығының төрағасы Соломон Дальоп жергілікті газетке қарулы адамдардың штаттағы Джол және Дорова Бабуже ауылдарына шабуыл жасағанын айтты.

Дальоп шабуылдарда 10 адамның қаза тапқанын және біраз тұрғынның жараланғанын жеткізді.

Оның айтуынша, шабуыл туралы хабар түскен соң аймаққа мемлекеттік қауіпсіздік күштері жеткен.

Нигерияның біршама аумағына ұзақ уақыт бойы қарулы топтар, сондай-ақ «Боко Харам» лаңкестік ұйымы және ДАИШ (ДАИШ — Қазақстан Республикасында тыйым салынған ұйым — ред.) ISWAP-тың Батыс Африка бөлімшесі шабуылдар жасады.

Айта кетейік, Нигерияда қарулы адамдар 300-ден астам баланы ұрлап кетті. Кейін содырлар әкеткен 100 оқушы қыз босатылды.