ОПЕК+ елдері сәуірден мұнай өндіру көлемін арттыруға уағдаласты

АСТАНА. KAZINFORM – Бұған дейін мұнай өндіру ерікті түрде қысқартылатын мәлімдеген ОПЕК+ 8 елі жаһандық нарықтың жай-күйі мен оның даму келешегін талқылау үшін онлай кездесу өткізді.

ОПЕК ақпаратына қарағанда, Сауд Арабия, Ресей, Ирак, БАӘ, Кувейт, Қазақстан, Алжир және Оман бұған дейін жоспарланғандай, сәуірден бастап мұнай өндіру көлемін біртіндеп ұлғайта бастайды.

— Нарықтағы тұрақты іргелі көрсеткіштерді және оның оң болжамын ескере отырып, олар 2024 жылдың 5 желтоқсанында қабылданған өзгермелі жағдайға бейімделу мүмкіндіктерін ескере отырып, 2025 жылдың 1 сәуірінен бастап ерікті түрде қысқартылған тәулігіне 2,2 млн баррель көлемге біртіндеп әрі икемді оралуға кірісу шешімін растады, — делінген хабарламада.

Таратылған мәліметке қарағанда, тараптар 2024 жылдың 3 сәуірінде Бірлескен министрлік мониторинг комитетінің 53-отырысында келісілген мұнайды ерікті түрде қосымша қысқартуды толықтай сақтауға ниетті екендігін қуаттады. Сонымен қатар олар өтем жоспарына сәйкес, 2024 жылдың қаңтарынан кез келген артық көлемді олардың орындалуын 2026 жылдың маусымында қамтамасыз ете отырып, толықтай өтеуге ниетті екендіктерін растады. 

— Артық өндіру көлемі бар елдер өтем кезеңінің алғашқы айларында басым бөлігі өтелуі үшін өздерінің өтемге қатысты міндеттемелерін орындауды жеделдетуге келісті, — делінген ОПЕК хабарламасында.

2024 жылдың аяғында Қазақстан ОПЕК+ аясындағы артық өндірісті өтеу мерзімін ұзартқаны хабарланған. Осыған орай Энергетика министрлігіндегілер Kazinform тілшісіне бұл шешім елдің мұнай өндіру нарығына қалай әсер ететінін айтты.