АСТАНА. ҚазАқпарат – Орал қаласында автокөліктен 642 дана киік мүйізі табылды, деп хабарлайды ҚазАқпарат тілшісі.
«Охотзоопром» ӨБ» РМҚК Батыс Қазақстан өңірлік филиалынан мәлім еткендей, оқиға Зачаган кентінің Бірлік көшесіндегі №17 үйдің алдында болған.
ҚР ҰҚК БҚО бойынша департаментінің қызметкерлері мен «Охотзоопром» ӨБ» РМҚК инспекторлары бірлесіп жүргізген жедел іс-шаралар кезінде бір тұрғынның басқа адамдардың көмектесуімен киік мүйіздерін өткізбектігі екендігі жөнінде мәлімет алынды.
«Департамент қызметкерлері мен «Охотзоопром» инспекторлары аталған үйдің алдында Chevrolet Captiva автокөлігін тінтіп, тергеу амалдарын жүргізді. Тінту барысында автокөлік салонының артқы жағы мен жүк салғышынан 5 қапқа салынған 642 дана киік мүйізін тауып, тәркіледі. Сараптама тағайындалып, ҚР ҚК 339-бабына сәйкес тергеу амалдары жүргізіліп жатыр», - деп хабарлады ведомстводан.
Еске сала кетейік, бұдан бұрын Батыс Қазақстанда 100-ден астам киіктің судан шығарылғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).