ОРАЛ. KAZINFORM — Орал қаласында облыстық жұқпалы аурулар ауруханасында 12 жастағы Дәмелі Абдрахманова қайтыс болды.
Туыстарының сөзіне қарағанда, қыз бала ауруханаға 28 маусым күні түскен. Оған іріңді баспа диагнозы қойылып, палатаға жатқызылған. Келесі күні жағдайы күрт нашарлап, көз жұмған.
Туыстары қыздың өліміне медицина қызметкерлерінің салғырттығы мен жайбасарлығы себеп болған деп есептейді.
Осы қайғылы оқиғаға байланысты Kazinform тілшісі БҚО денсаулық сақтау басқармасына арнайы сауал жолдаған еді.
Басқарма мәліметіне қарағанда, қазіргі кезде тексеру жүргізіліп жатыр.
— Сот-медициналық сараптама әлі аяқталмағандықтан, өлімнің нақты себебі анықталған жоқ. Ресми ақпарат сот-медициналық сараптама қорытындысы шыққаннан кейін берілетін болады, — делінген жауапта.
Еске сала кетейік, бұдан бұрын БҚО-дағы ауруханада лифт жұмыс істемеуіне байланысты науқастарға қиын болып тұрғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).