ОРАЛ. KAZINFORM — Батыс Қазақстан облысы полиция департаменті ұйымдасқан қылмысқа қарсы күрес басқармасының қызметкерлері Орал қаласының 21 жастағы тұрғынын қолға түсірді.
БҚО полиция департаменті баспасөз қызметінің мәліметінше, ол 24 жастағы азаматты күш қолданамын деп қорқытып, одан бірнеше ай бойы ірі көлемде ақша бопсалаған. Сонымен қатар ол жәбірленушіні шағын несиелер рәсімдеуге мәжбүрлеп, алынған қаражатты өз пайдасына жаратқан.
— Келтірілген жалпы материалдық шығын 4 миллион теңгеден асты. Анықталғандай, 11 желтоқсанда аталған азамат басқа бір қылмыстық іс бойынша 6 жылға бас бостандығын шектеу жазасына кесілген. Дәл сол күні тағы бір қылмыстық іс бойынша күдіктіге айналды. Қазіргі уақытта ол уақытша ұстау изоляторына қамалды. Тергеу амалдары жүргізіліп жатыр, - деп хабарлады ведомстводан.
Еске сала кетейік, бұдан бұрын БҚО-да интернет-алаяқтар жәбірленушілерге 1,8 млрд теңге залал келтіргенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).