ОРАЛ. KAZINFORM – Орал қаласында автогаз құю стансаларының бірқатарында сұйытылған мұнай газы жоқ болса, барларында кезек сейілмей тұр. Осы орайда Kazinform тілшісі кезекте тұрған жүргізушілермен тілдесіп көрді.
Фото: Ғайсағали сейтақ/Kazinform
Айболат Есқалиевтің айтуынша, жүргізушілер сұйытылған газдың тапшылығынан қиындық көруде.
«Оралда шынында да газ бірде бар, бірде жоқ. Болғанның өзінде, міне, ұзын-сонар кезек. Қаншама уақытты жоғалтып жатырмыз. Әлде сұйытылған газдың бағасын көтерейін деп жатыр ма, белгісіз. Мәселенің қашан шешілетінін де білмейміз», - дейді А.Есқалиев.
Фото: Ғайсағали сейтақ/Kazinform
БҚО энергетика, тұрғын үй-коммуналдық шаруашылық басқармасы басшысының орынбасары Бейімбет Мусиннің сөзіне қарағанда, бүгіннен «Жайықмұнай» ЖШС облыс үшін қараша айына бекітілген 4 030 тоннаны беруді бастайды. Бүгін 160 тоннаға жуық сұйытылған мұнай газы жіберіледі.
Фото: Ғайсағали сейтақ/Kazinform
«Өткен айда Атырау облысы бізбен бірге Батыс Қазақстанда өндірілген өнімнің жартысын алып отырды. Яғни «Жайықмұнай» ЖШС күніне 200 тонна шығарса, соның жартысымен бөлістік. Енді осы айда Атырау облысы газды басқа зауыттан алады», - деді Б.Мусин.
Еске сала кетейік, бұдан бұрын Батыс Қазақстан облысында сұйытылған газ тапшылығы туындағанын жазған болатынбыз.
Батыс Қазақстанда газ құю стансаларында кезек әлі көп.
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).