ОРАЛ. ҚазАқпарат - Оралда автокөлік қағып кеткен жігіт жансақтау бөлімінде жатыр, деп хабарлайды ҚазАқпарат тілшісі.
Оқиға 8 маусым күні болған. «Toyota Camry» автокөлігінің С.Тюленин көшесі бойындағы автобазар тұсында жаяу жүргіншіні қағып кеткені бейнебақылау камерасына түсіп қалған.
Облыстық денсаулық сақтау басқармасының баспасөз хатшысы Айнагүл Сақпосынованың айтуынша, жедел жәрдем сағат 13.39-да шақырылған. Жедел жәрдем көлігі 13.43-те жеткен. 1997 жылғы тұрғын басынан жарақат алған әрі миы шайқалған.
«Қазіргі кезде жігіт қалалық көпбейінді аурухананың жансақтау бөлімінде жатыр. Есі әлі кірген жоқ, жағдайы ауыр»,- деді А.Сақпосынова.
Аталған дерек бойынша ҚР ҚК 345-бабы 2-бөлігіне сәйкес (ауыр дене жарақатын келтірген жол жүру ережесін бұзу) сотқа дейінгі тергеу амалдары жүргізілуде.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).