ОРАЛ. KAZINFORM — Орал қаласында автосалондардың бірінде жүк көтеретін лифтіден төрт әйел құлап кетіп, жарақат алды.
БҚО ТЖ департаментінің баспасөз қызметінен мәлім еткеніндей, оқиға М.Шолохов көшесі бойындағы қос қабатты автосалонда болды.
- Тростың үзілуі салдарынан 2-қабаттан төменгі қабатқа төрт адам құлап кеткен. Оқиға орнына құтқарушылар барып, зардап шеккендерге алғашқы медициналық көмек көрсетті.
Содан кейін олар жедел жәрдем бригадасына тапсырылып, түрлі жарақатпен қалалық көпбейінді ауруханаға жатқызылды. Оқиғаның себеп-салдары анықталу үстінде, - деп хабарлады ведомстводан.
БҚО бойынша еңбек инспекциясы департаментінің басшысы Асылұлан Досжанов аталмыш жазатайым оқиға бойынша тергеп-тексеру жұмыстары жүргізіліп жатқанын жеткізді. Тексеріс қорытындысы бойынша тиісті шара қабылданатын болады.
Еске сала кетейік, бұдан бұрын БҚО-да жазатайым оқиғалар салдарынан 11 адамның зардап шеккенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).