ОРАЛ. ҚазАқпарат – Оралда бір күнде полицейге пара бермек болған екі жүргізуші ұсталды, деп хабарлайды ҚазАқпарат тілшісі.
БҚО полиция департаментінің баспасөз қызметі мәлім еткеніндей, оқиға 18 қазан күні орын алды.
Сағат 00.30-да 44 жастағы жүргізуші «МАЗ-5440» автокөлігімен Сырым Датұлы көшесімен келе жатып, «Ел ырысы» базары тұсында тоқтауға болмайтын жерге аялдаған. Сол жерде патрульдік полиция батальоны қызметкерлерінің қолына түскен. Содан кейін «Лада Ларгус» қызметтік көлігінде отырып, әкімшілік хаттама толтырмау үшін полиция қызметкеріне 2 мың теңге ұсынған.
Екінші оқиға М.Шолохов пен К.Циолковский көшелерінің қиылысында болды. Сағат 10.55-те 63 жастағы жүргізуші «Ауди-80» автокөлігімен бағдаршамның тыйым салынған белгісіне қарамастан, өтіп кеткен. Ол да әкімшілік хаттама толтырмау үшін 5 мың теңге берген.
Қазіргі кезде екі оқиға бойынша да ҚР ҚК 367-бабы 1-бөлігіне (пара беру) сәйкес сотқа дейінгі тергеу амалдары жүргізілуде.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).