ОРАЛ. KAZINFORM – Орал қаласында құрбандық мал шалынатын үш орын белгіленді. Бұл туралы қала әкімдігінде Құрбан айт мерекесін ұйымдастыру және өткізу жөнінде өткізілген жиында айтылды.
Облыс орталығында «Кублей» ЖШС, «БҚО тұрақтандыру қоры» ЖШС («Ел ырысы») және «Батыс адал ет» ЖШС-да мал құрбандыққа шалынатын болады. Сондай-ақ Қазақстан мұсылмандары діни басқармасы құрбан шалу рәсімін қашықтан өткізуге арналған qurban2024.kz сайтын іске қосты.
Жиын барысында қала әкімінің орынбасары Арсен Ғұбашев мерекені ұйымдастыру және өткізуге қатысты бірқатар тапсырма берді. Құзырлы мекемелерге құрбанға шалынатын малдардың ветеринарлық тексерістен өтуін, құжаттарының дұрыс болуын қадағалау, құрбандық шалынатын орындарда санитарлық талаптардың орындалуын қадағалау жүктелді. Сонымен қатар белгіленген орындардың абаттандырылуы, қоғамдық қауіпсіздіктің сақталуы қатаң бақылауда болуы қажет.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).