ОРАЛ. ҚазАқпарат - Оралда Қазақстан халқы Ассамблеясының 20 жылдығына арналған алғаш рет өзге ұлт өкілдері арасында «Домбыра достыққа шақырады» атты облыстық байқау мәреге жетті.
«Тіл - татулық тірегі» айлығы аясында ұйымдастырылған өнер додасына облыс аудандары мен Орал қаласынан 15 үміткер қатысып, бақ сынады. Олар байқау шарты бойынша қос күймен қоса қазақ тілінде екі ән орындады.
Сайыс қорытындысында Құрманғазы атындағы музыка колледжінің шәкірті Наргиз Қасымова бас жүлдені жеңіп алды. Д.Нұрпейісова атындағы №1 музыка мектебінің оқушысы Мария Гладкова бірінші, осы білім ордасынан Дильназ Мұстафаева мен Зеленов ауданынан келген Виталий Мигалев екінші, зеленовтықтар Полина Ищенко, Полина Сармина, теректілік Илья Панченко үшінші орындарды иеленді.
Шараны ұйымдастырушылардың бірі, «Жігерлі жастар» қоғамдық бірлестігі директорының орынбасары Асқар Кенжеғалиевтің айтуынша, алдағы уақытта Оралда Достық үйі ашылған кезде өзге ұлт балаларын домбыраға үйрету мүмкіндігі артады. Сонда байқауды дәстүрлі түрде өткізумен бірге республикалық деңгейге көтеруге болады. Бұл қазақтың өнері мен тілін насихаттаудың бір жолы болмақ.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).