ОРАЛ. ҚазАқпарат - Орал қаласында БҚО ІІД әкімшілік полиция басқармасы қызметкерлері жергілікті полиция қызметімен бірлесе отырып, жалған мемлекеттік нөмірлер тағып, әйнектер күңгірттелген, сондай-ақ айыппұлы бар жүргізушілерді анықтау мақсатында арнайы рейд жүргізді.
БҚО Ішкі істер департаментінің баспасөз қызметінен түскен мәліметке қарағанда, шара барысында иелері 290 мың 327 теңге айыппұл «арқалаған» 24 автокөлік ұсталды. 2 автокөлік ҚР Әкімшілік құқықбұзушылық кодексінің 797-бабына сәйкес айып тұрағына қойылса, қалғандары айыппұлын сол жерде төледі. Сонымен қатар «тұтқындалған» 1 автокөлік айып тұрағына жеткізілді. Әкімшілік құқықбұзушылық кодексінің 612-бабына сәйкес көлік жүргізу құқығынан айырылса да, иелері айдап жүрген 3 көлік сондай күй кешті. 590-бапқа сәйкес күңгірттелген әйнектері бар 6 көлік те алысқа кеткен жоқ.
Осындай рейдтік іс-шаралар облыстың барлық аудандарында өткізілмек.
Еске сала кетейік, биылғы сегіз айда 2316 автокөлік айып тұрағына қойылып, соның нәтижесінде 25 млн. астам теңге айыппұл өтелген болатын.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).