ОРАЛ. KAZINFORM — Орал қаласында тойдағы жанжалға байланысты әлеуметтік желіде бейнежазба тарады. Бейнежазбада «тентек кәде» сұраған ер адамды жаңа құдалардың бірі ұрып құлатқаны анық көрінеді. Осыған байланысты Kazinform тілшісі БҚО полиция департаментіне арнайы сауал жолдаған еді.
Департамент мәліметіне қарағанда, той 22 тамыз күні Орал қаласында болған.
— Бейнежазбадағы азаматтардың жеке басы анықталды. Аталған дерек бойынша қылмыстық іс қозғалды. Тергеу барысы бақылауға алынды. Қазақстан Республикасы Қылмыстық іс жүргізу кодексінің 201-бабына сәйкес өзге ақпарат жария етуге жатпайды, — делінген ресми жауапта.
Қазіргі кезде оқиғаның мән-жайы анықталып жатыр.
Еске сала кетейік, бұдан бұрын Оралда екі автокөлік соқтығысып, әйел адам көз жұмғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).