Оралда тұрғындар ағаштардың кесіліп жатқанын айтып шағымданды
ОРАЛ. KAZINFORM — Орал қаласында Н.Назарбаев атындағы даңғыл бойында ағаштардың кесіліп жатқаны жөнінде әлеуметтік желіде бейнежазба жарияланды.
Фото: Ғайсағали Сейтақ/Kazinform
Қала тұрғынының Instagram әлеуметтік желісінде мәлім еткеніндей, «Баспахана» аялдамасы тұсында бұрын бірнеше ағаш болған.
Фото: Ғайсағали Сейтақ/Kazinform
— Міне, қараңыз, қандай теректер кесілген. Бұған кім рұқсат берді? Осы аялдама маңында әйтеуір бір нәрсе жасалады да жатады. Енді тендерді жеңіп алған біреу өз плитасын төсейтін болар. Даңғылдың қарсы бетінде тым-тәуір асфальт болған, оны да алып тастаған. Жыл сайын тек бір жерде тақтатас пен асфальт төсейді. Әсіресе, әкімдіктер алдында. Қаланың шеткері аймақтарында өткен ғасырдан бері ештеңе істелмейді, — дейді әйел.
Еске сала кетейік, бұдан бұрын Орал қаласында ағаштың неліктен кесіліп жатқанын жазған едік.
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).