ОРАЛ. ҚазАқпарат – Оралда түрме ауласына тыйым салынған заттар лақтырған екі тұрғын ұсталды, деп хабарлайды ҚазАқпарат тілшісі.
БҚО қылмыстық-атқару жүйесі департаментінің аға инспекторы Дастан Ақшолақовтың айтуынша, олар осылайша заттарды түрмедегі танысына жеткізбек болған.
Қолға түскен екі ер адамнан ұялы телефон, таблеткалар мен белгісіз сұйықтық құйылған құты табылды. Олардың сөзіне қарағанда, тыйым салынған заттарды жазасын өтеп жатқан досына бермек болған.
Қазіргі таңда аталған екі тұрғынға қатысты ҚР Әкімшілік құқықбұзушылық кодексі 481-бабына (қылмыстық-атқару жүйесiнің мекемелерiнде, арнаулы мекемелерде ұсталатын адамдарға тыйым салынған заттар, бұйымдар мен нәрселер беру) сәйкес іс қозғау мәселесі шешілуде.
Сонымен қатар бұл екеуі төтенше жағдай талабын бұзғаны үшін 476-бапқа сәйкес Орал қаласы мамандандырылған әкімшілік сотының қаулысымен 5 тәулікке әкімшілік қамауға алынды.
Еске сала кетейік, бұдан бұрын БҚО-да коронавирус жұқтырған төрт науқастың Ресейден келгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).