ОРАЛ. ҚазАқпарат – Орал қаласында мансардалы жеке үй өртеніп кетті, деп хабарлайды ҚазАқпарат тілшісі.
БҚО Төтенше жағдайлар департаментінің баспасөз қызметінен мәлім еткеніндей, оқиға 12 қазан күні А.Оразбаева көшесі, 49 мекенжайында болды.
Сағат 08.47-де өрт шыққаны жөнінде хабар түскен. Оқиға орнына дереу жеткен №1 мемлекеттік өрт сөндіру бөлімінің қызметкерлері аумағы 160 шаршы метрді құрайтын үйдің мансардасы мен гаражы жанып жатқанын анықтады. Сондықтан №2 және №8 өрт сөндіру бөлімдерінен қосымша техника шақырылды.
Өрттің таралуы сағат 09.55-те тоқтатылып, 11.35-те толықтай сөндірілді.
Зардап шеккендер жоқ.
Қазіргі кезде оқиғаның себебі, келтірілген шығын анықталу үстінде.
Биыл жыл басынан бері облыста тұрғын үй секторында барлығы 302 өрт тіркелді. Салдарынан 3 адам қаза тауып, 8-і түрлі жарақат алды.
Еске сала кетейік, бұдан бұрын БҚО-да бір мезгілде 5 үйдің ауласы өртенгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).