Ақтөбедегі автобус өрті кезінде 52 адам қаза болып, 5 адам түрлі жарақатпен ауруханада ем қабылдады. Бұған дейін хабарлағанымыздай, үш жүргізуші ауруханадан шығарылып, тергеу жүргізілген болатын. Ал бүгін №2 қалалық сотында алдымен жүргізуші Нұржан Қырғызбаев 2 айға уақытша тергеу изоляторына қамалды. Санкцияға жүргізуші Мақсат Пернебековтың туған-туыстары арнайы келді. Олар ауруханада кездесе алмаған, қайғылы оқиғадан кейін Мақсат Пернебековті көрмеген.
«Біз Ақтөбеге бүгін келдік. Інімізбен кездесу мүмкін болмады. Мен оны кінәлі деп есептемеймін», - деді Гүлшат Пернебекова.
Судья Алима Адилова жүргізушілер Мақсат Пернебеков пен Барат Таңатовты да екі ай мерзімге күзетпен ұстау туралы бұлтартпау шарасын санкциялады. Жүргізушілердің бәрі тергеу жұмыстары аяқталғанша изоляторда отырады.