АСТАНА. KAZINFORM — Қытайдың Ханчжоу қаласында волейболды отырып ойнаудан әлем чемпионатында Қазақстан құрамасы жартылай финалға шықты.
Қазақстандық параволейболшылар ширек финалда Руанда командасына тап келді.
Руанда 1/8 финалда Қытай құрамасын ұтып, сенсация жасаған еді. Дегенмен Бауыржан Тахауовтың шәкірттері бәсеке тізгінін бірден өз қолына алды.
Бірінші партияда 25:8 есебі тіркелсе, екінші сетте де қазақстандықтар айқын басымдылық танытты — 25:13. Бауыржан Сартаев, Пердебай Намұратов, Ерік Қасқабаев, Жанғали Сүйеуовтер нәтижелі ойнай білді.
Үшінші партия 25:20 есебімен аяқталды. Қорытынды есеп — 3:0, Қазақстанның пайдасында.
Осылайша, қазақстандық параволейболшылар жүлделі орын таласуға мүмкіндік алды.
Еске сала кетейік, бұдан бұрын қазақстандық параволейболшылардың әлем чемпионатының ширек финалына шыққанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).