Ал биыл балалар оқу жылын жаңа мектепте бастайды. Ғимарат 120 орынға есептелген, аумағы 1,5 мың шаршы метрден асады. Іші жарық, әрі кең. Мұнда физика, химия, биология, STEM-зертхана жасақталып, спорт және шығармашылықпен айналысатын орындар пайда болды.
— Ескі мектеп ыңғайсыз еді. Бұрын балабақша болғандықтан онда бізге кабинет жетіспейтін. Ал қазір зертхана, оқу бөлмелері, үлкен асхана мен кең спортзалымыз бар. Кабинеттерде компьютер мен интерактивті тақталар орнатылған, — дейді мектеп директорының орынбасары Құралай Қаспақова.
Химия және биология пәнінің мұғалімі ретінде Құралай үшін оқушыларда практикалық дәрістерге қажеттінің бәрі болуы өте маңызды.
— Ескі мектепте біз толыққанды зертханалық жұмыстар жүргізе алмадық. Негізінен виртуалды зертханаларды қолданып, тәжірибе жұмысын экранда көрсетіп келдік. Енді балалар өздері тәжірибе жасай алады. Ол үшін бізде құралдар мен реактивтер бар, — дейді ұстаз.
Оң өзгерістерге оқушылар да лайықты бағасын берді. Бесінші сыныптағы Ирина Щетининаға жаңа мектептің үлкен спорт залы ұнапты.
— Мектеп өте әдемі, мұнда орын көп, — дейді оқушы қыз.
Жаңа оқу жылында мектепте күрес, үстел теннисі, хореография, шахмат, домбыра мен вокал секциялары ашылады.
— Біздің балаларымыз мейлі ауыл болсын, мейлі қала болсын, қай жерде тұратындарына қарамастан сапалы білім алуға тиіс. Біз Атығай ауылының тұрғындарына берген уәдені орындағанымызға ризамыз, — деді мектептің ашылу салтанатында аймақ басшысы Асайын Байханов.
Ол жаңа мектеп құрылысына 1,48 млрд теңге бөлген жоба демеушісі — KAZ Minerals Bozshakol компаниясына ерекше алғысын білдірді.
— KAZ Minerals үшін өзі жұмыс істейтін өңірдегі жобаларға қолдау көрсету өте маңызды. Біз өз инвестицияларымыздың шынымен де аса маңызды салаларға — ең алдымен білім мен денсаулық сақтау саласына бағытталғанын қалаймыз, — деп атап өтті KAZ Minerals Bozshakol директоры Джонатан Рао.
Оның сөзінше, компания әлеуметтік жобаларды аймақтың қажеттілігіне сай жүзеге асырады. Жуырда KAZ Minerals қолдауымен Екібастұздағы теміржол вокзалында жөндеу жұмысы жүргізілді. Ал 1 қыркүйекте 127 бала Атығайдағы жаңа мектеп табалдырығын аттайды.