АСТАНА. KAZINFORM - Футболдан Қазақстан Премьер-лигасының он бірінші турында қостанайлық «Тобыл» өз алаңында Алматының «Қайратын» жеңді.
Қостанайлық клуб төрт тур бойы жеңілістің ащы дәмін татты. Салдарынан турнир кестесіндегі жағдайын қиындатып алды. Осыдан кейін бас бапкер Милич Чурчич қызметінен кетті. Оның орнына Нұрбол Жұмасқалиев тағайындалды.
Қазақстандық маманның жетекшілігімен өткен алғашқы кездесуде қостанайлық клуб үш ұпайды олжалап кетті. Бүгінгі кездесуде Игор Ивановичтің 31-минутта соққан жалғыз голы ойын тағдырын шешті.
Осылайша қостанайлық клуб қарсыласын 1:0 есебімен тізе бүктіріп, турнир кестесінде алтыншы орынға көтерілді.
Ал «Шахтер» өз алаңында «Атырауға» 1:3 есебімен жеңілсе, «Қайсар» мен «Тұран» 1:1 есебімен тең түсті.
Енді 16 маусымда «Жетісу» (Талдықорған) мен «Жеңіс» (Астана), «Елімай» (Семей) мен «Ақтөбе», «Астана» мен «Ордабасы» (Шымкент) командалары ойнайды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.