Президент Садыр Жапаров Камчыбек Ташиевтің отставкаға кетуіне қатысты түсінік берді

АСТАНА. KAZINFORM – Қырғызстан президентіСадыр Жапаров Камчыбек Ташиевтің Министрлер кабинеті төрағасының орынбасары – Ұлттық қауіпсіздік мемлекеттік комитетінің төрағасы қызметінен кетуіне қатысты түсінік берді, деп хабарлайды Кабар ақпарат агенттігі. 

- Мен бұл шешімді ең алдымен мемлекетіміздің мүддесі үшін, қоғамдағы, соның ішінде мемлекеттік органдар арасындағы бөлінудің алдын алу және керісінше – бірлікті нығайту мақсатында қабылдадым, - деп жеткізді президенттің сөзін оның баспасөз хатшысы Асқат Алагөзов.

Осыған дейін Қырғызстанның ҰҚМК басшылық құрамында ауыс-түйіс болғанын хабарладық. 

Қамчыбек Ташиев министрлер кабинеті төрағасының орынбасары – ҰҚМК төрағасы қызметінен босатылды. Сондай-ақ төрағаның үш орынбасары қызметінен босатылды.

ҰҚМК төрағасының міндетін атқарушы болып Жумгалбек Шабданбеков тағайындалды. Оның кандидатурасы Қырғызстан Республикасы Жогорку Кенешіне ҰҚМК төрағасы қызметіне тағайындауға бекіту үшін ұсынылып отыр.