Президент тапсырмасы: Катонқарағайдағы әуежай құрылысы 80% аяқталды

ӨСКЕМЕН. KAZINFORM – Шығыс Қазақстан облысындағы Катонқарағай ауданында салынып жатқан әуежайды сертификаттау рәсімі келесі жылдың ақпан айында басталмақ.

Фото: ШҚО әкімдігі

ШҚО Жолаушы көлігі және автомобиль жолдары басқармасының мәліметіне сүйенсек, Мемлекет басшысының тапсырмасымен Катонқарағай ауданында салынып жатқан жаңа әуежай құрылысының 80 пайыздан астамы аяқталды.

Қазіргі уақытта ұшу-қону жолағы толық дайын. Мамандар әуежайды қажетті жабдықтармен жарақтандыру, жолаушылар терминалы мен техникалық нысандардағы жұмыстарды аяқтау үстінде.

Фото: ШҚО әкімдігі

2027 жылдың ақпан айында әуежайды сертификаттау рәсімін бастау жоспарланып отыр. Ал әуе айлағын туристік маусым басталғанға дейін пайдалануға беру көзделген.

- Әуежайдың асфальтбетонмен қапталған ұшу-қону жолағының ұзындығы 2 200-2 260 метр, ені 35 метр. Әуежай сағатына 150 жолаушыға дейін қызмет көрсете алады. Сондай-ақ Bombardier Q400 және ATR-72 секілді орташа сыйымдылықтағы заманауи турбовинтті ұшақтарды қабылдауға қауқарлы болады. Жаңа әуежайдың ашылуы Катонқарағай ауданына жетуді жеңілдетіп, туризмнің дамуына серпін бермек, - делінген ақпаратта.

Еске салсақ, бұған дейін Зайсан әуежайында сертификаттау рәсімі басталғаны хабарланған.