Самара-Шымкент автожолында қауын тиелген көлік өртеніп кетті
18:13, 18 Қыркүйек 2018
АҚТӨБЕ. ҚазАқпарат - Самара-Шымкент тасжолында қауын тиелген жүк көлігі өртеніп кетті, деп хабарлай ҚазАқпарат тілшісі.
«Бүгін сағат 12.20-да Хромтау ауданы, «Самара-Шымкент» тасжолының 872-ші шақырымында автокөліктің қауын тиелген тіркемесі өртенді. Жалынды сөндіруге ТЖД-нің Өрт сөндіру және апаттық-құтқару жұмыстары қызметінен 2 адам, Әскерилендірілген апаттық құтқару қызметінен 3 адам және 1 автокөлік жіберілді. Өрт сағат 14:05-те ауыздықталды», - деп хабарлады облыстық ТЖД-ның баспасөз қызметінен.
Қазір өрттің шығу себебі мен шығыны анықталуда. Зардап шеккендер жоқ.