ШҚО-да жүкті әйел тікұшақпен ауруханаға жеткізілді

ӨСКЕМЕН. KAZINFORM – Шығыс Қазақстан облысында жүкті әйел тікұшақпен ауруханаға жеткізілді.

ШҚО төтенше жағдайлар департаменті баспасөз қызметінің мәліметіне сүйенсек, жүкті әйелге шұғыл медициналық көмек көрсету мақсатында ТЖМ-нің санавиациясы іске қосылды.

- «Өскемен-Самар-Өскемен» бағыты бойынша ұшқан Ми-8 тікұшағын Руслан Ағламбеков пен Леонид Калеканов басқарды. Ұшу барысында пациентке қажетті медициналық көмекті санавиация дәрігерлері Марат Көксегенов, Татьяна Сергеева және Рима Меңдібаева көрсетті, - деп хабарлады ведомство өкілдері. 

ТЖМ экипажы мен дәрігерлердің жедел әрекеттерінің арқасында болашақ ана Өскемен қаласындағы медициналық мекемеге аман-есен жеткізілді.

Еске салсақ, осыған дейін Риддерде жаңа туған нәресте шұғыл түрде Өскеменге тікұшақпен жеткізілгені хабарланған.