ӨСКЕМЕН. KAZINFORM — Шығыс Қазақстан облысы Глубокое ауданындағы Верхнеберезовский ауылында қытайлық Dengbo Success Minerals Ltd компаниясы игеруді жоспарлап отырған Ново-Березов кен орны аумағынан шахта суын заңсыз төгу тоқтатылды.
Табиғатты қорғау прокуратурасы жағдайды бақылауға алды. Ал ШҚО Экология департаменті жоспардан тыс тексеру жүргізуге дайындалып жатыр.
Бұған әлеуметтік желіде тараған видео себеп болған. Кадрларда су ағыны көбік және сарғыш түсті шөгінділер көрінеді. Ауыл тұрғындары жер бетіне нақты не төгілгенін және судың қайдан келіп жатқанын анықтауды талап етті.
Судың құрамында қандай да бір ластаушы заттардың бар-жоғы әзірге анықталған жоқ.
Еске салсақ, осыған дейін СҚО-да ағын суды заңсыз ағызған кәсіпорынға 174 млн теңге айыппұл салынғанын жазғанбыз.
Ботакөз Кенжеханқызы
2018 жылы С. Аманжолов атындағы Шығыс Қазақстан университетін «журналистика» мамандығы бойынша тәмамдаған. Еңбек жолын 2017 жылы Ұлан аудандық «Көктау нұры» газетінде бастады. Әр жылдары Шығыс Қазақстан облыстық «Менің өлкем» газеті мен Buqara.kz сайтында тілші, Amanzholov University баспасөз хатшысы қызметтерін атқарған.