АСТАНА. KAZINFORM — Қазақстанның екінші, әлемнің 107-ракеткасы Александр Шевченко Стокгольм (Швеция) ATP 250 турнирінің жартылай финалынан тыс қалды.
Қазақстандық теннисші ширек финалда әлемнің 51-ракеткасы, аргентиналық Тьяго Агустин Тирантемен шеберлік байқасты.
Бірінші партияда тай-брейкте Тиранте сәтті ойнады — 7:6 (7:5).
Екінші сетте дәл осындай есеппен А.Шевченко есе қайырды — 7:6 (7:5).
Үшінші, шешуші партияда аргентиналық спортшы жеңісті жұлып алды — 6:3.
Екі сағат 49 минутқа созылған тартысты бәсекеде Шевченко 8 эйс жасағанымен, 3 брейк-пойнтты пайдалана алмады. Тиранте 20 эйспен бірге 5 брейк-пойнттың біреуін өз есебіне жазды.
Тьяго Агустин Тиранте финалға шығу үшін әлемнің 31-ракеткасы, Чили өкілі Алехандро Табиломен таласады.
Осылайша, Стокгольмде жарысты іріктеу сайыстарынан бастаған Александр Шевченконың 4 матчқа созылған жеңіс сериясы тоқтады.
Еске сала кетейік, бұдан бұрын Александр Шевченконың Швециядағы турнирде қатарынан үш кездесуде жеңіске жеткенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).