АСТАНА. KAZINFORM — Қазақстан құрамасының мүшесі, әлемнің 738-ракеткасы Соня Жиенбаева Оренсе (Испания) ITF W75 турнирінің финалында ойнады.
Қазақстандық теннисші соңғы бәсекеде әлемнің 442-ракеткасы, болгариялық Изабелла Шиниковамен чемпиондық атақты сарапқа салды.
Бірінші партияда С.Жиенбаева тай-брейкте табандылық танытты – 7:6 (7:2).
Екіншісінде болгариялық спортшы есе қайырды – 6:3.
Үшінші, шешуші сетте Соня 5:0 есебімен алға кетті. Ақыры матчты жеңіспен түйіндеді – 6:1.
Тартысты бәсеке 1 сағат 51 минутқа созылды.
Осы титулы нәтижесінде Соня Жиенбаева WTA рейтингісінде өз көрсеткішін едәуір жақсартады.
Еске сала кетейік, бұдан бұрын Астана турнирінде Дамир Жалғасбай мен Асылжан Арыстанбекованың финалға жолдама алғанын жазған едік.
Сондай-аақ Соня Жиенбаева Испаниядағы жарыстың финалында өнер көрсетеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).