АСТАНА. KAZINFORM — Қазақстандық теннисші, әлемнің 450-ракеткасы, 20 жастағы Соня Жиенбаева Виго (Испания) ITF W35 турнирінің финалына жолдама алды.
Қазақстандық спортшы жартылай финалда әлемнің 272-ракеткасы, португалиялық Матилде Жоржемен шеберлік байқасты.
Бірінші партияда тай-брейкте португалиялық теннисші сәтті ойнады — 7:6 (10:8).
Екіншісінде Соня Жиенбаева есе қайырды — 6:4. Үшінші, шешуші сетте Соня тізгінді бермеді — 6:2. Тартысты өткен бәсеке 2 сағат 36 минутқа созылды.
Осылайша, Соня Жиенбаева Испаниядағы жарыстарда қатарынан екінші рет финалға өтті.
Өткен аптада қазақстандық теннисші Оренсе (Испания) ITF W75 додасында үздік шыққан еді.
Еске сала кетейік, бұдан бұрын Соня Жиенбаеваның Испаниядағы турнирдің жартылай финалына өткенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).